રામબનમાં આર્મી ટ્રક 700 ફૂટ ઊંડી ખાઈમાં પડ્યો, ત્રણ જવાન શહીદ
Jammu-Kashmir: જમ્મુ અને કાશ્મીરના રામબન જિલ્લામાં રવિવારે એક મોટો અકસ્માત સર્જાયો હતો. આર્મીનો ટ્રક લગભગ 700 ફૂટ ઊંડી ખાઈમાં ખાબક્યો હતો. આ દુ:ખદ અકસ્માતમાં ત્રણ સૈનિકો શહીદ થયા છે. અધિકારીઓએ જણાવ્યું હતું કે, આ અકસ્માત સવારે 11.30 વાગ્યે રાષ્ટ્રીય ધોરીમાર્ગ-44 પર બેટરી ચશ્મા નજીક થયો હતો. આ આર્મી ટ્રક જમ્મુથી શ્રીનગર જઈ રહ્યો હતો તે સમયે દુર્ઘટના સર્જાઈ હતી.
અકસ્માત પછી તરત જ, SDRF, પોલીસ, સેના અને સ્થાનિક સ્વયંસેવકોએ સંયુક્ત રીતે બચાવ કામગીરી શરૂ કરી હતી. આ અકસ્માતમાં વાહન સંપૂર્ણપણે કાટમાળમાં ફેરવાઈ ગયું હતું અને તેમાં મુસાફરી કરી રહેલા ત્રણ સૈનિકો શહીદ થયા હતા. શહીદ સૈનિકોના નામ અમિત કુમાર, સુજીત કુમાર અને માન બહાદુર છે. તેમના મૃતદેહોને ખાડામાંથી બહાર કાઢવામાં આવી રહ્યા છે. અધિકારીઓએ જણાવ્યું હતું કે, અકસ્માત એટલો દુ:ખદ હતો કે અકસ્માત બાદ વાહન કાટમાળમાં ફેરવાઈ ગયું હતું. સેના અને વહીવટીતંત્ર બંનેએ સૈનિકોના બલિદાન પર શોક વ્યક્ત કર્યો છે. અકસ્માતના કારણની તપાસ શરૂ કરવામાં આવી છે.
