દિલ્હી કેપિટલ્સે ચેન્નાઈ સુપર કિંગ્સને 25 રનથી હરાવ્યું, બેટ્સમેન બાદ બોલરોના શાનદાર પ્રદર્શન
CSK vs DC: બેટ્સમેન બાદ બોલરોના શાનદાર પ્રદર્શનના કારણે દિલ્હી કેપિટલ્સે ચેન્નાઈ સુપર કિંગ્સ (CSK)ને 25 રનથી હરાવ્યું. દિલ્હીની આ સતત ત્રીજી જીત છે અને IPL 2025માં તેમનું અપરાજિત અભિયાન ચાલુ છે. IPLની 18મી સીઝનમાં દિલ્હીનું પ્રદર્શન શાનદાર રહ્યું છે અને 2009 પછી આ પહેલીવાર છે જ્યારે તેણે કોઈ સીઝનની પ્રથમ ત્રણ મેચ જીતી છે.
પોઈન્ટ ટેબલમાં દિલ્હી ટોચ પર પહોંચી
શનિવારે ચિદમ્બરમ સ્ટેડિયમ ખાતે રમાયેલી આ મેચમાં દિલ્હીએ પ્રથમ બેટિંગ કરી અને 20 ઓવરમાં 6 વિકેટે 183 રન બનાવ્યા. જવાબમાં CSK 20 ઓવરમાં 5 વિકેટે માત્ર 158 રન બનાવી શક્યું. આ CSKનો સતત ત્રીજો પરાજય છે. આ પહેલા તે રાજસ્થાન રોયલ્સ અને RCB સામે પણ હારી ગયું હતું. ચેન્નાઈ સામેની જીત સાથે દિલ્હીની ટીમ 6 પોઈન્ટ સાથે પોઈન્ટ ટેબલમાં ટોચ પર પહોંચી ગઈ છે, જ્યારે CSK ટીમ 4 મેચમાં 1 જીત અને 3 હાર સાથે 2 પોઈન્ટ સાથે આઠમા સ્થાને છે.
આ જીત સાથે દિલ્હીએ ચેપોક સ્ટેડિયમમાં CSK સામે 15 વર્ષ પછી જીત મેળવી. દિલ્હી છેલ્લે 2010માં ચેન્નાઈમાં CSK સામે જીત્યું હતું. તે સમયે ટીમ 6 વિકેટથી જીતી હતી. એટલે કે ટીમે 14 વર્ષ 11 મહિના અને 20 દિવસ પછી ચેપોક ખાતે ચેન્નાઈને હરાવ્યું છે. ચેન્નાઈમાં CSK અને દિલ્હી વચ્ચે 10 મેચ રમાઈ છે, જેમાંથી CSKએ 7 અને દિલ્હીએ 3 મેચ જીતી છે.
