ભારતનું એરસ્પેસ બંધ થવાથી કંગાળ પાકિસ્તાનની મુશ્કેલીઓ વધશે, જાણો ફ્લાઈટ્સ પર શું થશે અસર
India Vs Pakistan: પાકિસ્તાન સાથેના તણાવ વચ્ચે ભારતે વધુ એક મોટી કાર્યવાહી કરી છે. ભારતે 23 મે સુધી પાકિસ્તાની વિમાનો માટે પોતાનું એરસ્પેસ બંધ કરી દીધું છે. આ સંદર્ભમાં, સરકારે ગઈકાલે સાંજે NOTAM પણ જારી કર્યું છે. આ પછી, પાકિસ્તાનનું કોઈપણ નાગરિક અથવા સૈન્ય વિમાન ભારતના એરસ્પેસ પરથી પસાર થઈ શકશે નહીં.
પાકિસ્તાની વિમાનો પર કાર્યવાહી થશે
ભારતીય એરસ્પેસ થયા બાદ હવે જો કોઈ પાકિસ્તાની વિમાન ભારતીય એરસ્પેસમાં પ્રવેશ કરશે તો તેની સામે કાર્યવાહી કરવામાં આવશે. આ પહેલા પાકિસ્તાને જ ભારતીય વિમાનો માટે પોતાની એરસ્પેસ બંધ કરી દીધી હતી. આ પછી બુધવારે CCSની બેઠકમાં ભારતે પાકિસ્તાની વિમાનો માટે તેની એર સ્પેસ બંધ કરવાના નિર્ણયને મંજૂરી આપી દીધી છે.
પાકિસ્તાની વિમાનોને શું નુકસાન થશે?
ભારતના આ નિર્ણયથી પહેલાથી કંગાળ પાકિસ્તાનની વધુ કમર તૂટી જશે. પાકિસ્તાન એરલાઇન્સને વધુ નુકસાન થશે. કારણ કે પાકિસ્તાની વિમાનોને દક્ષિણ પૂર્વ એશિયા સુધી પહોંચવા માટે લાંબા અંતર સુધી ઉડાન ભરવી પડશે. ઉદાહરણ તરીકે, હાલમાં પાકિસ્તાની ફ્લાઇટ્સને મલેશિયા પહોંચવામાં લગભગ સાડા પાંચ કલાક લાગે છે. હવે ભારતીય એરસ્પેસ બંધ થયા બાદ પાકિસ્તાની વિમાનોએ મલેશિયા પહોંચવા માટે 8.5 કલાકની મુસાફરી કરવી પડશે. તેવી જ રીતે બાંગ્લાદેશ, સિંગાપોર અને ઓસ્ટ્રેલિયા જેવા દેશોમાં જવા માટે પાકિસ્તાની વિમાનોએ વધુ ચક્કર મારવા પડશે.
એરલાઇન ભાડામાં પણ વધારો થશે
ઉદાહરણ તરીકે ઇસ્લામાબાદથી ઓસ્ટ્રેલિયા (સિડની) સુધીની ફ્લાઇટ્સ સામાન્ય રીતે 15-19 કલાક લે છે. જો કે, ભારતીય એરસ્પેસ બંધ થવાને કારણે હવે પાકિસ્તાની વિમાનોએ લાંબા રૂટનો ઉપયોગ કરવો પડશે. આવી સ્થિતિમાં વિમાનમાં વધુ ઈંધણની જરૂર પડશે. વધુ ઇંધણના ઉપયોગને કારણે, હવાઈ ભાડામાં પણ વધારો થશે.
